झापा–५ बाट बालेन शाहको ऐतिहासिक विजय : पूर्वप्रधानमन्त्री केपी शर्मा ओलीलाई झण्डै ५० हजार मतले पराजित
राष्ट्रिय स्वतन्त्र पार्टी (रास्वपा)का नेता बालेन्द्र शाह (बालेन) ले झापा निर्वाचन क्षेत्र नं. ५ बाट प्रतिनिधिसभा सदस्यमा ऐतिहासिक जित हासिल गरेका छन्। उनले पूर्वप्रधानमन्त्री तथा नेकपा (एमाले) अध्यक्ष केपी शर्मा ओलीलाई ठूलो मतान्तरले पराजित गरेका हुन्।
निर्वाचन अधिकृतको कार्यालयका अनुसार बालेन शाहले ६८ हजार ३४८ मत प्राप्त गरेका छन् भने उनका निकटतम प्रतिद्वन्द्वी ओलीले १८ हजार ७३४ मत मात्रै पाएका छन्। यसरी शाहले ओलीलाई ४९ हजार ६१४ मतान्तरले पराजित गर्दै झापा–५ मा ठूलो राजनीतिक उलटफेर गरेका हुन् ।
यस निर्वाचन क्षेत्रमा कुल १ लाख ६३ हजार ३७९ मतदाता रहेकामा १ लाख ६ हजार ५६८ मत खसेको थियो।
यस नतिजालाई विश्लेषकहरूले नेपाली राजनीतिमा नयाँ पुस्ताको नेतृत्वप्रति मतदाताको आकर्षण तथा राजनीतिक परिवर्तनको संकेत का रूपमा व्याख्या गरेका छन्।
